Градоначалникот на Скопје, Орце Ѓорѓиевски, информира дека со засилена динамика продолжуваат градежните работи на клучката „Момин Поток“, која ја оцени како еден од најзначајните инфраструктурни проекти за главниот град.
Тој посочи дека по години застој, предизвикан од нерешени имотно-правни односи, веднаш по преземањето на функцијата биле преземени активности за надминување на пречките и продолжување на реализацијата на проектот.
Според Ѓорѓиевски, веќе е поставен нов асфалт на коловозните ленти за влез во Скопје, а по целосното расчистување на трасата ќе започне изградбата и на лентите што водат кон булеварот „Словенија“.
Во рамки на проектот паралелно се градат и три моста. Во моментов се урива стариот дел од мостот над реката Серава, додека првиот дел е веќе изграден и следува негово комплетирање. Истовремено се изведуваат работи и на новата атмосферска канализација.
Ѓорѓиевски истакна дека по завршувањето, клучката „Момин Поток“ ќе придонесе за значително растоварување на сообраќајот, побрзо и побезбедно движење и современо сообраќајно решение за овој дел од Скопје. Тој најави дека по овој проект ќе следуваат и нови големи инфраструктурни зафати во градот.
