Дваесет пожарникари завршија во болница по силна експлозија што се случи при гаснење голем пожар во индустриски комплекс во Есекс, на југоистокот на Англија.
Пожарот избувнал во петок во комплекс со повеќе индустриски објекти во близина на местото Ретендон, по што била прогласена вонредна состојба, а жителите од околните објекти биле евакуирани.
Експлозијата настанала откако се запалило ѓубриво складирано во еден од објектите. Пожарот брзо се проширил и зафатил неколку згради, како и околните земјоделски површини.
Во интервенцијата учествувале повеќе од 100 пожарникари. Сите 20 повредени биле пренесени во болница, при што четворица се здобиле со полесни повреди, додека останатите биле прегледани превентивно, вклучително и поради можни оштетувања на слухот од силната детонација. По укажаната лекарска помош, сите биле пуштени на домашно лекување.
Силата на експлозијата била толку голема што се слушнала и на околу 24 километри од местото на несреќата, во градот Саутенд. Во инцидентот биле уништени три противпожарни возила и уште две службени возила на командниот кадар.
Пожарникарите и понатаму остануваат на терен за целосно локализирање на преостанатите жаришта и за санирање на последиците од големиот пожар.
