(Видео) Голем пожар ја пустоши југозападна Франција: Евакуирано популарно туристичко место, двајца пожарникари загинаа

Француските власти наредија целосна евакуација на полуостровот Кап Фере, едно од најпознатите летувалишта на југозападниот брег на Франција, поради големиот шумски пожар што продолжува да се шири. Илјадници жители и туристи го напуштија подрачјето, дел по копнен пат, а дел со бродови.

Префектот на департманот Жиронда, Софи Брока, ја нареди завршната фаза од евакуацијата, при што жителите беа упатени да заминат по главниот пат кон Бордо, додека за останатите беа организирани бродови од четири пристаништа.

— реклама —

Пожарот избувна во вторникот во местото Сомос, на југозападот на Франција, а досега зафати околу 8.700 хектари. Во гаснењето на огнената стихија загинаа двајца пожарникари во близина на аеродромот во Бордо, додека властите соопштија дека нема нови повредени.

Францускиот претседател Емануел Макрон изјави дека состојбата со пожарите е „многу напната“, особено во регионот Жиронда, и потврди дека Франција побарала помош преку механизмите на Европската Унија.

— реклама —

Во помош на француските служби се вклучуваат противпожарни авиони од Хрватска, Португалија, Чешка и Словачка. Хрватското Министерство за одбрана соопшти дека канадер „Canadair CL-415“ со два екипажа и технички персонал, вкупно 11 припадници на вооружените сили, утрово полетал кон Франција.

Во меѓувреме, втор голем пожар избувна во близина на Бискарос, на околу 40 километри јужно од Кап Фере. Огнот, кој сè уште не е ставен под контрола, уништи околу 2.500 хектари, а повеќе од 23.000 лица се евакуирани од околината, вклучително и жители на кампови и дом за стари лица.

— реклама —

Со сериозна пожарна криза се соочува и Шпанија. Тамошната влада прогласи вонредна состојба откако неколку големи пожари се заканија на подрачјата околу Мадрид и соседната покраина Авила. Евакуирани се повеќе од 10.000 жители, а во гаснењето се ангажирани стотици припадници на итните служби и воените единици.

Според шпанските власти, ова е првпат да биде прогласена ваква вонредна состојба поради шумски пожари. Годинава во Шпанија изгореле повеќе од 100.000 хектари земјиште, а во пожарите загинале 13 лица, што ја прави 2026 година една од најсмртоносните во последните децении.

Експертите предупредуваат дека екстремните топлотни бранови, долгата суша и исушената вегетација, поттикнати од климатските промени, значително придонесуваат за брзото ширење и интензитетот на шумските пожари низ јужна Европа.