(Видео) Голем шумски пожар беснее во близина на Париз, евакуирани околу 1.000 луѓе

Франција се соочува со голем шумски пожар во близина на шумата Фонтенбло, околу 70 километри југоисточно од Париз, додека земјата и понатаму е погодена од силен топлотен бран.

Пожарот, кој властите го опишуваат како „жесток“ и „од исклучителни размери“, зафатил околу 800 хектари и принудил на евакуација околу 1.000 жители и туристи од делови на општината Ле Водуа.

— реклама —

Градоначалникот на Ле Водуа, Мишел Калми, изјави дека „ѕид од пламен“ брзо се приближил до селото и стигнал до рабовите на станбените населби.

Портпаролката на француската влада, Мод Брежон, оцени дека станува збор за исклучителна ситуација и нагласи дека пожар од вакви размери досега не бил забележан во северниот дел на Франција.

За гаснење на пожарот, властите ангажираа два канадера, авиони „Даш“, два противпожарни хеликоптери и извидувачки авион. Канадерите за првпат интервенираат во регионот околу Париз, полнејќи вода од реката Сена.

— реклама —

Пожарот предизвика и сериозни нарушувања во сообраќајот. Делумно е затворен главниот автопат што ги поврзува северот и југот на Франција, а нарушен е и железничкиот сообраќај, при што патниците на железничката станица „Гар де Лион“ во Париз се соочуваат со доцнења до шест часа.

— реклама —

Во исто време, 37 француски департмани се под највисок, црвен степен на предупредување поради екстремните горештини.

Викендов низ земјата беа отворени околу 2.000 центри за разладување во рамки на кризниот план ОРСЕК, а болниците бележат зголемен број пациенти поради високите температури.

Поради топлотниот бран, привремено се запрени и три нуклеарни електрани за да се избегне испуштање прегреана вода во реките, а организаторите на велосипедската трка „Тур де Франс“ ја скратија неделната етапа за 30 километри поради температури што се приближуваат до 40 Целзиусови степени.

Француските власти најавија дека во наредните недели за гаснење пожари ќе почнат да користат и воени транспортни авиони „Ербас А400М“, по завршувањето на обуката на екипажите.