(Видео) Голем шумски пожар беснее во Франција: Евакуирани стотици жители, на терен 550 пожарникари

Голем шумски пожар избувна во департманот Од, на југот на Франција, каде што огнената стихија досега зафатила најмалку 800 хектари. Во гаснењето се вклучени околу 550 пожарникари, а властите апелираат граѓаните да не се приближуваат до загрозеното подрачје.

Пожарот избувнал вчера околу 16:30 часот во близина на местото Упије, триесетина километри северно од Нарбон, а поради силниот ветер, високите температури и сувата вегетација, брзо се проширил кон североисточниот дел на департманот.

— реклама —

Интервенцијата е дополнително отежната поради непристапниот и ридски терен, па за обезбедување пристап до критичните точки биле ангажирани и два булдожера.

— реклама —

Во гаснењето, покрај пожарникарите од два департмана и засилувањата од департманот Тарн, учествуваат и припадници на жандармеријата. Од воздух дејствуваат четири противпожарни авиони „Канадер CL-415“, два авиона „Де Хавиланд Канада Деш 8“ и еден хеликоптер.

Поради опасноста, меѓу 150 и 200 жители биле евакуирани, а на населението му е препорачано да остане во затворени простории. Повеќе локални патишта се затворени, додека густ чад е видлив на голема оддалеченост.

— реклама —

Францускиот премиер Себастијан Лекорну денеска треба да отпатува во Марсеј, каде што ќе претседава со меѓуресорен кризен штаб посветен на топлотниот бран, пожарите и мерките за справување со екстремните временски услови.

Ова е првиот пожар од вакви размери во Франција годинава и потсетува на катастрофалниот пожар во масивот Корбиер во август 2025 година, кога огнот зафати околу 17.000 хектари, при што животот го загуби едно лице, а повеќе други беа повредени.