(Видео) Големи пожари ја пустошат Грција – Атина во највисока состојба на тревога, илјадници евакуирани и во Франција

Грција и натаму е во состојба на висока готовност поради шумските пожари што продолжуваат да беснеат на повеќе локации низ земјата, додека нови жаришта повторно се активираат и во Франција.

За голем дел од Грција е прогласен највисок степен на ризик од пожари, а службите за цивилна заштита издадоа црвен аларм за поширокото подрачје на Атина.

— реклама —

Најкритична е состојбата на околу 60 километри северозападно од главниот град, каде пожарот се шири на фронт долг неколку километри. Според медиумските извештаи, стотици луѓе биле евакуирани со бродови на безбедни локации.

Пожари беснеат и на полуостровот Пелопонез. Портпарол на противпожарната служба соопштил дека во петокот навечер пожарникарите интервенирале на дури 73 различни локации.

— реклама —

View this post on Instagram

Нов голем пожар избувнал и западно од Атина, поради што превентивно било евакуирано предградието Дасос, откако густ чад и пламен се доближиле до густо населениот дел.

Големи пожари продолжуваат да горат и на островот Крит. Иако таму состојбата е нешто постабилна, силниот ветер создава опасност огнот повторно да се разгори и значително ги отежнува интервенциите од воздух.

— реклама —

Во меѓувреме, на југот на Франција, во департманот Вар меѓу Марсеј и Кан, пожар повторно се активирал и за само неколку часа зафатил околу 1.000 хектари.

Поради брзото ширење на огнот, евакуирани биле околу 2.500 жители, а во гаснењето се ангажирани 720 пожарникари.

Франција и соседна Шпанија веќе неколку дена се борат со серија големи шумски пожари, поттикнати од високите температури и сувата вегетација, додека научниците предупредуваат дека климатските промени придонесуваат за сè почести и поинтензивни пожари.

Со големи шумски пожари во моментов се соочува и Турција.