(Видео) Гори шатор во „Ќациленд“, граѓаните влегоа во паркот по изборниот пораз на Вучиќ

Пожар избувна вечерва во Пионерскиот парк во Белград, познат како „Ќациленд“, откако граѓани влегоа во оградениот простор и започнаа да ги отстрануваат шаторите и металните огради по прогласувањето на изборната победа на студентската листа во Србија.

Според доставените информации, горел еден од шаторите, заедно со предметите што се наоѓале во него. Засега нема информации за повредени лица, ниту е утврдено како настанал пожарот.

Граѓаните почнале да влегуваат во паркот откако Александар Вучиќ го призна изборниот пораз, а групите мажи облечени во црно, од кои дел носеле качулки и фантомки, го напуштиле просторот.

— реклама —

Претходно во текот на денот, неколку часа пред затворањето на избирачките места, во паркот повторно биле поставувани шатори и друга инфраструктура. Во исто време таму пристигнувале групи непознати мажи, а нивното движење било забележано и на снимки објавени од српските медиуми.

— реклама —

Неделникот „Време“ објави снимки од влегувањето на граѓаните во „Ќациленд“, додека на социјалните мрежи се појавија и видеа од отстранувањето на оградите и шаторите.

Во близина на Пионерскиот парк во текот на изборната вечер биле распоредени припадници на Жандармеријата, кои, според медиумските извештаи, се повлекле по обраќањето на Вучиќ.

— реклама —

„Ќациленд“ е неофицијалниот назив за кампот што првично беше поставен во Пионерскиот парк како собир на групи што се претставуваа како студенти кои сакаат да учат, наспроти студентското протестно движење.

Со текот на времето кампот се прошири и на просторот пред Народното собрание на Србија, а неговото постоење беше предмет на политички спорови и критики. Шаторите пред Собранието беа отстранети кон крајот на декември минатата година, кога Вучиќ најави поставување празнични содржини на тој простор.

Најновите случувања во Пионерскиот парк доаѓаат во момент кога студентската листа прогласи изборна победа, а Вучиќ призна дека неговата коалиција ги загубила парламентарните избори.