Густ црн чад повторно се издига над Скопје по избувнувањето на пожар на дива депонија во близина на спортскиот аеродром „Стенковец“. Гори наталожен отпад, а поради ветерот чадот и непријатната миризба се шират кон градот.
Директорот на Центарот за управување со кризи, Стојанче Ангелов, информира дека скопските пожарникари се на терен и интервенираат, но гаснењето е отежнато поради големата површина зафатена од огнот и количината на отпад.
„Се крева црн чад како атомска бомба. Скопските пожарникари стигнаа на лице место. Поголема површина ќе биде тешко да се совлада. Активен е подолго време, гори наталожен отпад, кој ќе има уште повеќе чад, повеќе густ чад и во наредниот период скопјани ќе почувствуваат уште поголем мирис“, изјави Ангелов.
Состојбата дополнително ја отежнува и пожарот во месноста Рамно на Скопска Црна Гора, во Општина Чучер-Сандево, кој гори веќе два дена. Силниот ветер го носи чадот во правец на Скопје, поради што граѓаните во делови од градот веќе го чувствуваат мирисот.
На терен таму дејствуваат скопски пожарникари, полициски хеликоптер, тимови на Дирекцијата за заштита и спасување со возила „Пинцгауер“, како и околу 30 припадници на Армијата. Целта е да се спречи ширењето на пожарот и неговото преминување преку патот.
Ангелов претходно информираше и дека голем пожар се заканува на куќите во близина на селото Милетино, Општина Брвеница, каде што на терен се тетовските пожарникари. За гаснењето се ангажирани и два „ер-трактори“.
Според неговата проценка, денеска во земјава има најмалку 30 пожари на отворен простор, што, како што оцени, е невообичаено висок број за овој период од годината.
