(Видео) Хаос во Тирана: Запалени владини објекти, полицијата со солзавец, водени топови и гумени куршуми

Жестоки судири меѓу демонстрантите и полицијата избувнаа во саботата во главниот град на Албанија, Тирана, каде што протестите против владата на премиерот Еди Рама прераснаа во насилни инциденти. Полицијата употреби солзавец, водени топови и гумени куршуми за да ги растера демонстрантите, кои фрлаа камења кон полициските службеници и ја запалија влезната врата на Министерството за земјоделство.

Илјадници граѓани се собраа на протестот организиран од студентското движење, кое веќе подолг период бара политичка одговорност поради корупцијата, недостигот од работни места и лошите услови во образованието.

— реклама —

На демонстрациите им се приклучија и универзитетски професори, уметници и претставници на опозициски партии, кои изразија поддршка за барањата на студентите.

Протестот започнал околу 14 часот пред Министерството за образование, каде што дел од демонстрантите почнале да фрлаат камења кон полицијата. По интервенцијата на безбедносните сили, собраните граѓани се разделиле во повеќе групи и се упатиле кон различни делови од центарот на Тирана.

— реклама —

Во текот на немирите биле запалени делови од владини објекти и банки, искршени излози на продавници, а демонстрантите ваделе камени плочи од тротоарите и ги фрлале кон полициските службеници.

Полицијата одговорила со средства за растерување на толпата, меѓу кои солзавец, водени топови и гумени куршуми. Засега во доставените информации нема потврдени податоци за бројот на повредени и приведени лица.

— реклама —

„Албанците се разбудија“, изјави 28-годишниот демонстрант Даниел Тахири, кој ја опиша актуелната власт како „диктатура облечена во демократско руво“.

Друга учесничка на протестот, Оргета Ликај, изјави дека граѓаните сакаат да му порачаат на Рама дека повеќе не го прифаќаат неговото владеење поради корупцијата и скандалите.

Демонстрациите во Тирана се дел од поширокиот бран протести што во текот на месецот се прошири и во други албански градови. Студентското движење бара подобри услови за образование и живот, додека дел од демонстрантите инсистираат на оставка од премиерот и промена на актуелната власт.

Најновите немири следуваат по повеќемесечни, претежно мирни протести против луксузен проект на албанското крајбрежје, поврзан со Џаред Кушнер, зет на американскиот претседател Доналд Трамп.

Еди Рама е на власт од 2013 година, а на парламентарните избори минатата година обезбеди четврти мандат. Сегашните демонстрации претставуваат нов притисок врз неговата влада, додека студентите и нивните поддржувачи најавуваат продолжување на протестите.