Во шумите на Националниот парк Шар Планина може да се забележат дрвја со изгребана кора, влакна или траги од кал, а од паркот објаснуваат дека овие знаци се дел од природното однесување на кафеавата мечка.
Мечките ги користат дрвјата како средство за комуникација и за обележување на своето присуство во природата. Со триење од стеблата тие оставаат мирисни сигнали за другите мечки, ја обележуваат својата територија, ја покажуваат својата големина и доминација, а понекогаш едноставно се чешаат или го менуваат старото крзно.
Од Националниот парк посочуваат дека ваквите „мечкини дрвја“ се важен дел од нивното природно однесување и им помагаат на експертите подобро да го следат присуството на овој значаен вид во планинските екосистеми.
Кафеавата мечка е еден од клучните видови за одржување на природната рамнотежа и претставува показател за здрави и добро сочувани шуми. Оттаму додаваат дека секоја трага во природата има свое значење и сведочи за богатството на дивиот свет на Шар Планина.
