Основното јавно обвинителство Скопје побара од надлежниот судија за деца да поведе подготвителна постапка против четворица малолетници поради врсничкото насилство врз 12-годишно девојче, кое се случи на 30 јуни на игралиште зад трговски центар во скопската општина Аеродром.
Подготвителна постапка е побарана против две 14-годишни девојчиња поради основано сомнение дека сториле дејствие кое со закон е предвидено како кривично дело „насилство“. За еден 15-годишник се бара постапка за помагање при извршување на насилството, како и за кривичното дело „неовластено снимање“, додека за уште еден 14-годишник е побарана постапка за „неовластено снимање“.
Според Обвинителството, двете девојчиња во група извршиле грубо насилство врз 12-годишното девојче, принудувајќи го да клекне и да им се извини, по што го удирале со шлаканици и го влечеле за коса. Во настанот учествувало и едно 13-годишно дете во ризик, кое поради возраста не може кривично да одговара.
Од нанесените удари девојчето се здобило со телесни повреди, а кај неговата другарка, која била сведок на настанот, како и кај јавноста, биле предизвикани чувство на несигурност, загрозеност и страв.
Обвинителството наведува дека едно од момчињата им давало совети, насоки и охрабрување на девојчињата при извршувањето на насилството. Двете момчиња, пак, без согласност од оштетената го снимиле целиот настан со мобилен телефон, со што ја повредиле нејзината приватност, а снимката потоа им ја испратиле на девојчињата кои учествувале во нападот.
Јавниот обвинител побарал од судот на малолетниците да им биде изречена мерка на претпазливост – забрана да се приближуваат, да воспоставуваат или да одржуваат каков било контакт меѓу себе и со жртвата.
Претходно, Министерството за внатрешни работи соопшти дека случајот е целосно расчистен и до Основното јавно обвинителство Скопје поднело кривични пријави против четворица малолетници и петмина родители.
Според МВР, против двете малолетнички се поднесени пријави за кривичното дело „насилство“, против едно момче за „поттикнување“ во врска со насилството и „неовластено снимање“, против уште едно момче за „неовластено снимање“, а против пет родители се поднесени кривични пријави поради сомнение за сторено кривично дело „запуштање и малтретирање на дете“.
