Стевчо Јакимовски преку објава на социјалните мрежи упати сериозни обвинувања кон ВМРО-ДПМНЕ, тврдејќи дека на објектот на Белата палата е изградена тераса без градежна дозвола и на државно земјиште.
Во видеото што го објави, Јакимовски вели дека станува збор за дивоизграден објект за кој, според него, треба да се сноси кривична одговорност.
„Ова позади мене, терасата на Белата палата, е изградена без градежна дозвола на државно земјиште, односно дивоизграден објект за кој се сноси кривична одговорност“, изјави Јакимовски.
Тој посочи дека објектот бил изграден во период кога, како што рече, ВМРО-ДПМНЕ имала министри за транспорт и врски, државни секретари, директори на Инспекторатот за урбанизам и министри за правда.
„Ги прекршиле сите закони и свесно го направиле тоа. За кого? Само за нивниот интерес“, рече Јакимовски.
Осврнувајќи се на постапките што се водат против него, тој истакна дека се критикува за изградба на две општински бараки што ги користела администрацијата на Општина Карпош, за кои, според неговите тврдења, имало одлука од Советот на Општината, обезбедени средства во буџетот и предвидени средства во програмата.
„Тие денеска се потсмеваат на тоа што јас сум изградил две општински бараки кои ги користела администрацијата на Општина Карпош. За нив имаше одлука од Советот, беа обезбедени средства во буџетот и во програмата. Едно зборуваат, друго прават“, порача Јакимовски.
