Поранешниот градоначалник на Општина Карпош, Стевчо Јакимовски, на вонредна прес-конференција ја оцени како политички мотивирана пресудата со која Основниот кривичен суд му изрече затворска казна.
Јакимовски изјави дека не е осуден затоа што сторил кривично дело или ја злоупотребил службената положба, туку поради политички причини.
„Осуден сум политички. Не затоа што сум направил кривично дело или сум ја злоупотребил својата положба и овластувања, туку затоа што на некого му пречам“, изјави Јакимовски.
Тој посочи дека предметот се однесува на две бараки поставени во дворот на Основното училиште „Лазо Трповски“, за кои тврди дека се времени објекти.
Според него, станува збор за конструкции од гипс-картон и челична конструкција кои можат да бидат демонтирани и преместени, поради што не треба да се третираат како трајни градби.
„Цело време докажуваме дека станува збор за времени објекти. Сепак, судот донесе пресуда како да се работи за цврста градба, што според мене е неточно“, рече Јакимовски.
Тој обвини и дека во предметот постојат два фалсификувани документи, додавајќи дека вештаците и форензичарите немале целосен пристап до доказите за да утврдат кој стои зад нив.
Јакимовски смета дека пресудата има политичка позадина и дека нејзината цел е да го спречи повторно да се кандидира за градоначалник на Општина Карпош на претстојните локални избори.
„Во оваа ситуација не е важно дали сте виновни или не. Очигледно постои потреба да бидам осуден и на тој начин да бидам спречен повторно да се кандидирам за градоначалник на Општина Карпош“, изјави Јакимовски.
