(Видео) Јемен тргна во голема офанзива против Хутите: „Ќе ја ослободиме целата земја“

Јеменската влада започна голема воена офанзива против Хутите со цел повторно да воспостави контрола врз териториите што се под нивна власт, во една од најголемите ескалации на конфликтот во последните години.

Претседателот на Претседателскиот совет Рашад ал-Алими објави почеток на воените операции и порача дека тие треба да продолжат до враќање на државната власт врз целата земја.

— реклама —

Одлуката следува по новото напредување на Хутите, кои го презедоа подрачјето Ал-Сафија и го пресекоа главниот пат што го поврзува Таиз со Аден, привремениот главен град на меѓународно признатата влада. Со тоа дополнително е стегнат обрачот околу Таиз, каде во изминатите денови се водат жестоки борби.

Јеменската армија соопшти дека извршила 257 операции врз позиции, движења и воени капацитети на Хутите низ повеќе делови од земјата. Според тврдењата на владините сили, во нападите биле убиени најмалку 700 припадници на Хутите. Овие бројки се тврдења на јеменската армија и засега нема независна потврда за нив.

— реклама —

Во операциите се вклучени и силите на коалицијата предводена од Саудиска Арабија, која изведува воздушни напади врз позиции на Хутите и обезбедува поддршка за владините сили.

Хутите, пак, тврдат дека возвратиле со балистички ракети и беспилотни летала кон објекти на саудиската нафтена компанија „Saudi Aramco“. Саудиската коалиција ги оспори дел од нивните тврдења за нападите.

— реклама —

Колку е сериозна новата фаза на конфликтот покажува и необичен момент на телевизија во Аден. Водител во живо ја извадил вратоврската и соопштил дека водителите повеќе нема да носат вратоврски и формални костуми, објаснувајќи дека земјата влегува во воена состојба и дека моментот не е за формалности.

Новата офанзива доаѓа по обновувањето на жестоките борби во Јемен и напредувањето на Хутите кон стратешки позиции на брегот на Црвеното Море и околу Баб ел-Мандеб, еден од најважните поморски премини во светот.

— реклама —

Хутите ја контролираат Сана и голем дел од северозападниот Јемен уште од 2014 година, додека меѓународно признатата влада е поддржана од Саудиска Арабија. Со новата офанзива, владините сили најавуваат обид за враќање на териториите под контрола на Хутите и повторно воспоставување на државните институции.