Јорданските системи за противвоздушна одбрана рано утрово пресретнаа и соборија пет ракети истрелани од Иран, соопштија вооружените сили на земјата.
Според јорданските власти, ракетите биле насочени кон нивната територија, но биле навреме откриени од системите за надзор и уништени пред да предизвикаат штета. Државната агенција „Петра“ објави дека нема жртви ниту материјална штета.
Во меѓувреме, иранската државна телевизија ИРИБ, повикувајќи се на соопштение на Исламската револуционерна гарда, објави дека цел на нападот била американска воена база во Јордан, како одговор на, како што наведуваат, „агресивните потези на американската војска“.
Од Револуционерната гарда порачаа дека ќе продолжат со операциите сè додека, според нив, постојат закани за Иран и активности на американските сили што ги оценуваат како незаконски.
Ова е трет ден по ред Јордан да се соочува со воздушни закани. Во вторникот јорданската војска собори еден дрон што навлегол во воздушниот простор на земјата, а ден претходно беа пресретнати уште две беспилотни летала. Властите тогаш не соопштија од каде биле лансирани.
