(Видео) „Како не ти е срам?“ – мајката на претепаното дете од Влае раскажа како реагирала мајка на едно од децата по пријавата во полиција

Мајката на 13-годишното дете кое беше брутално претепано од група малолетници на плоштадот „Делфина“ во скопската населба Влае, за „Скопје1“ раскажа дека по нападот контактирала со мајка на едно од децата, но наместо разбирање за повредите на нејзиниот син, се соочила со негодување поради пријавувањето на случајот во полиција.

Според нејзиното сведоштво, жената со која разговарала реагирала со повишен тон, прашувајќи ја како не ѝ било срам што го пријавила настанот. Таа, како што раскажува мајката на повреденото момче, сметала дека станува збор за деца и не очекувала случајот да заврши со полициска пријава.

— реклама —

„Упорно имаше викање на висок тон од нејзина страна. Како не ми било срам. Тие биле деца, таа не очекувала дека јас вака ќе го пријавам во полиција“, раскажа мајката за „Скопје1“.

Мајката претходно раскажа дека момчето било опколено од група од околу 15 до 20 малолетници, дел од нив постари од него. Според неа, нападот започнал со шлаканица, по што повеќе деца го удирале со тупаници и клоци, а тврди дека бил употребен и боксирач.

— реклама —

View this post on Instagram

— реклама —

Особено загрижувачко е нејзиното сведоштво дека синот првично ја молел да не го пријавува нападот, плашејќи се дека повторно ќе биде претепан.

„Ако пријавиш, мамо, повторно ќе се случи истото“, ѝ рекло детето, според нејзините зборови.

Таа сепак решила да го пријави случајот, нагласувајќи дека не може да дозволи нејзиниот син да живее во страв. Нападот е пријавен во полиција, а детето било подложено на лекарски прегледи.

Тврдењата за реакцијата на другата мајка се изнесени од мајката на повреденото дете и засега не се независно потврдени.