Најмалку 157 лица загинаа, а стотици се водат како исчезнати по разорните поројни поплави што ги погодија пограничните области на Непал и Тибет во Кина. Меѓу исчезнатите има и голем број странски туристи.
Катастрофата била предизвикана од огромен налет на вода, кал и остатоци што се излеале од коритото на река која минува меѓу Кина и Непал. Во Непал биле однесени куќи, патишта, мостови и електроенергетски објекти, додека властите во Тибет предупредуваат на можност од голем број жртви.
Непалските власти издале предупредувања до населението во повеќе области да се оддалечи од реките Боте Коши, Тришули и Нарајани.
Според официјалните податоци од Непал, 403 лица се пријавени како исчезнати, од кои 341 се странски државјани. Меѓу нив има лица од Индија, САД, Велика Британија, Австралија, Јужна Кореја и Малезија.
Од непалскиот туристички одбор соопштиле дека повеќе од 100 од исчезнатите се верски туристи од Индија и индиската дијаспора кои биле на аџилак кон планината Кајлаш во Тибет, свето место за хиндусите.
Меѓу исчезнатите се и најмалку 62 непалски државјани, кои биле дел од поголеми групи што пешачеле во областа Расува, една од најтешко погодените.
Во Тибет, кинеската државна телевизија соопшти дека најмалку три лица загинале, а 265 се водат како исчезнати.
Точната причина за катастрофата сè уште се утврдува.
Американскиот геолошки институт регистрирал земјотрес со магнитуда од 4,4 степени рано во средата во Непал, во близина на границата со Тибет. Се разгледува можноста потресот да предизвикал отцепување на големо парче мраз од глечер, кое паднало во планинска долина и предизвикало ненадеен бран по течението на реката Лхенде Кола, притока на Боте Коши.
Властите предупредуваат дека поплавите може дополнително да се влошат бидејќи делови од реката и натаму се блокирани со мраз, карпи и наноси.
Предупредувања се издадени и во индиските сојузни држави Бихар и Утар Прадеш, кои се наоѓаат низводно од погодените реки.
Спасувачките операции се одвиваат во исклучително тешки услови. Хеликоптери не можеле да слетаат во делови од Сјапру Беси и Тимуре, во планинската област Расува, додека нивото на водата не се намали. Дополнителен проблем претставуваат и обилните монсунски дождови.
„Има уништување каде и да погледнете. Населбите покрај реката се целосно однесени. Петмина мои роднини се исчезнати“, изјавил здравствен работник од Расува.
Непалското Министерство за енергетика соопштило дека снабдувањето со електрична енергија е сериозно нарушено, главно поради уништени хидроцентрали.
Во спасувачките операции се вклучени полицијата и армијата, а премиерот Балендра Шах наредил населението од пониските области да биде префрлено на побезбедни места.
Индискиот премиер Нарендра Моди соопштил дека разговарал со Шах и понудил „секаков можен вид хуманитарна помош“.
Во Кина, голема операција за пребарување и спасување се спроведува во тибетската погранична област Ѓиронг. Кинескиот претседател Си Џинпинг побара максимални напори за пронаоѓање на исчезнатите и засилување на системите за следење и рано предупредување.
Хималајскиот регион, кој ги опфаќа Непал, Индија, Кина и Бутан, е особено изложен на поплави и свлечишта. Истражувањата покажуваат дека регионот се загрева побрзо од глобалниот просек, а топењето на глечерите се забрзува.
Обединетите нации во 2023 година соопштија дека планините во Непал изгубиле речиси една третина од мразот за нешто повеќе од три децении.
Минатата година поплава на реката Боте Коши однесе девет животи и уништи мост што ги поврзува Непал и Кина, а сообраќајот и трговијата беа нарушени со месеци.
