Франција се соочува со серија разорни шумски пожари кои уништија илјадници хектари шуми и ниска вегетација, оштетија и уништија десетици домови, а многу жители беа принудени да ги напуштат своите куќи.
Францускиот министер за внатрешни работи Лоран Нунјез соопшти дека во пожарите досега изгореле речиси 40.000 хектари шуми и ниска вегетација, додека 111 лица се приведени под сомнение дека предизвикале пожари.
Еден од најсериозните пожари избувнал во Трињак, во департманот Атлантска Лоара, каде што огнот уништил шест куќи и зафатил површина од околу 20 хектари. Благодарение на интервенцијата на противпожарните служби и авионите за гаснење, пожарот бил ставен под контрола.
Во Тарадо, северозападно од заливот Сен Тропе, огнената стихија уништила десетина куќи, а околу 50 дополнително се оштетени. Во гаснењето на пожарите во департманот Вар се ангажирани повеќе од 600 пожарникари, кои се борат со пламенот во исклучително тешки услови, предизвикани од екстремните горештини, сушата и силниот ветер.
Поради опасноста од ширење на пожарите, десетици жители биле евакуирани како превентивна мерка.
Француската метеоролошка служба прогласи висок ризик од пожари во 27 департмани, додека во шест е активирано портокалово ниво на тревога поради топлотниот бран.
Министерот Нунјез предупреди дека во текот на неделата постои сериозна опасност од ново ширење на пожарите на југозападот и југоистокот на Франција, поради екстремната суша, густата вегетација и силните ветрови, кои овозможуваат огнот многу брзо да се шири.
