Кавадарци и годинава се подготвува за традиционалниот Тиквешки гроздобер, една од најголемите културни манифестации во земјава, која од 4 до 6 септември ќе понуди музичка, културна и забавна програма за посетителите од Македонија и странство.
Претседателот на Советот на Општина Кавадарци, Стојанчо Рамов, на прес-конференција истакна дека Тиквешкиот гроздобер претставува дел од идентитетот на градот и традиција која датира од 1964 година.
Според него, интересот за манифестацијата од година во година расте. На минатогодишното издание, преку камерите на трите влеза во Кавадарци биле регистрирани околу 9.500 возила во текот на трите карневалски денови, што, според проценките, значи меѓу 50.000 и 60.000 посетители.
„Сметам дека и оваа година ќе бидеме добри домаќини, ќе бидеме гостопримлив народ и нашите посетители од Кавадарци ќе си заминат со многу емоции“, порача Рамов.
Тој посочи дека годинава посебно се водело сметка за застапеноста на македонските изведувачи. На главната сцена, како што рече, македонските артисти ќе бидат побројни од странските, во сооднос два спрема еден, а дополнително ќе настапуваат и локални бендови на втората сцена.
На главната сцена во петок ќе настапат Зибон, Девито и диџеј Галовски, во сабота Нокаут, Дупер и Жељко Самарџиќ, додека во недела публиката ќе има можност да ги проследи настапите на Слободанка Танева, Мирјана Митрева, Јела Рамовиќ и Пеџо Јовановски.
Рамов посочи дека Тиквешкиот гроздобер не се сведува само на музичката програма. Во рамките на манифестацијата ќе има традиционален турнир „Сестри Китеви“, промоција на монографијата „50 години музеј“, таблијада, мото-содржини, дегустација на вино, изложба на олдтајмери и други активности.
Посебно место има и традиционалната гроздоберска трпеза, која годинава ќе биде поставена на улица „Линденска“ на 4 септември од 10 часот. Посетителите ќе имаат можност да пробаат традиционална тиквешка храна, рачели, кавадаречки мекици, како и вино и ракија.
Централен дел од програмата ќе биде традиционалниот Тиквешки карневал, кој ќе се одржи во сабота од 18 часот на улица „Илинденска“, додека детскиот карневал е предвиден за недела во истиот термин. Се очекува да учествуваат околу 1.000 учесници со 30 маски.
Организаторите најавија и продолжување на традицијата на гостопримство, па на трите влеза во Кавадарци посетителите ќе добиваат пакетче со грозје.
За реализацијата на Тиквешкиот гроздобер од општинскиот буџет се издвојуваат 6 милиони денари, додека вкупната вредност на манифестацијата, со сите содржини, изнесува меѓу 11 и 12 милиони денари. Од 5 до 6 милиони денари се обезбедуваат преку поддршка од општествено одговорни компании од Кавадарци.
Рамов нагласи дека во организацијата се вклучени повеќе институции и служби, меѓу кои Министерството за внатрешни работи, Територијалната противпожарна единица, јавните претпријатија, Општата болница во Кавадарци и Црвениот крст, со цел манифестацијата да помине безбедно и без поголеми проблеми.
На крајот, организаторите упатија апел за одговорно консумирање алкохол и најавија дека се надеваат на најпосетеното издание досега.
„Отворени се вратите на Кавадарци за сите, од сите места во Македонија, како и за гости од странство“, порача Рамов.
