Потпретседателката на Социјалдемократската младина на Македонија (СДММ), Стефанија Кузмановска, на денешната прес-конференција обвини дека претседателот на организацијата, Трајче Трајковски, бил прераспределен од работното место во Штип во Берово поради неговото јавно политичко делување.
На прес-конференција одржана пред Управата за јавни приходи, Кузмановска оцени дека станува збор за обид за притисок и замолчување на младите кои јавно ги изразуваат своите ставови.
„Трајче е казнет затоа што не молчи. Наместо да се охрабруваат младите да бидат активни и гласни, се испраќа порака дека секој што јавно ќе проговори може да се соочи со последици“, изјави Кузмановска.
Таа посочи дека со прераспределбата Трајковски ќе треба да патува повеќе од 100 километри од местото на живеење до новото работно место.
Од СДММ тврдат дека ваквите постапки претставуваат форма на реваншизам и притисок врз младите луѓе, особено во период кога, според нив, сè повеќе млади ја напуштаат државата.
„Денес е Трајче, утре може да биде кој било млад човек кој ќе одлучи јавно да го каже своето мислење“, порача Кузмановска.
Од младинската организација на СДСМ нагласуваат дека ќе продолжат јавно да ги изнесуваат своите ставови и покрај, како што велат, обидите за притисоци и заплашување.
