(Видео) „СДММ е со студентите - Бараме достоинствени услови во домовите и студентски оброк од 200 денари“, вели Кузмановска

Студентскиот дом „Стив Наумов“ повторно се соочува со сериозни проблеми, и покрај неодамнешната реконструкција. Влага, протекување вода, неисправно греење и недостиг од топла вода се дел од недостатоците на кои укажува претседателката на СДММ, Стефанија Кузмановска, посочувајќи дека последниот проблем е пукањето на бојлер во домот.

— реклама —

На прес-конференција таа праша дали ова се условите од најавуваната А-категорија на студентски домови што ги ветувале министерката Весна Јаневска и премиерот Христијан Мицкоски.

— реклама —

Кузмановска ја критикуваше и одлуката за зголемување на партиципацијата за сместување, која сега изнесува 6.600 денари месечно, иако, според неа, студентите не добиле соодветни услови за живот. Таа посочи дека студентскиот оброк и натаму изнесува 140 денари дневно.

Од СДММ обвинуваат дека со вториот ребаланс на буџетот биле скратени средствата за образование, реконструкција и енергетска ефикасност на студентските домови. Воедно, ја критикуваат Владата поради тоа што сè уште не е зголемен студентскиот оброк.

— реклама —

СДММ бара зголемување на студентскиот оброк на 200 денари дневно, оценувајќи дека тоа е минимален износ за обезбедување пристоен и здрав оброк. Од организацијата порачуваат дека остануваат со студентите и ќе продолжат да бараат подобри услови за сместување и живот во студентските домови.