(Видео) Крмов: Сточарите го даваат млекото без цена, а Владата замижува пред неконтролираниот увоз

Пратеникот од Левица, Борислав Крмов, на седницата посветена на опозициски пратенички прашања упати две прашања до Министерството за земјоделство, шумарство и водостопанство, предупредувајќи на, како што оцени, сериозната состојба во земјоделскиот сектор и недоволната реакција на Владата.

Крмов најпрво изрази жалење што новоименуваниот министер Борче Серафимовски не присуствувал на седницата, оценувајќи дека требало лично да одговара на прашањата на пратениците.

— реклама —

Осврнувајќи се на состојбата во млечниот сектор, тој рече дека сточарите се соочуваат со неисплатени субвенции, неизвесен откуп и откупни цени кои, според него, не ги покриваат ниту основните производствени трошоци.

— реклама —

„Толку се очајни сточарите што моментално го даваат млекото без цена. Подобро им е да го предадат, па потоа да потпишуваат договори, отколку да им пропадне производството“, изјави Крмов.

Тој додаде дека домашното производство покрива околу 62 проценти од потребите на пазарот, но оцени дека домашните производители се ставени во неповолна положба поради, како што рече, неконтролираниот увоз на евтино млеко и млеко во прав од Србија.

— реклама —

„Големите млекарници, кои се сопственост на српски фирми, повеќе се грижат за своите кооперанти во Србија отколку за сточарите во Македонија. Владата знае каде е проблемот, но замижува“, рече Крмов, барајќи од Министерството да преземе мерки за ограничување на увозот и заштита на домашното производство.

Во второто пратеничко прашање, Крмов ја критикуваше политиката на доделување ловишта под концесија на приватни лица, оценувајќи дека тоа довело до прекумерен лов, намалување на дивечот и слабеење на ловните друштва.

Тој побара Министерството да ја преиспита оваа политика и повторно да овозможи ловиштата да им се доделуваат исклучиво на ловните друштва.