Сцени како од криминален филм се одвивале пред аеродромот во еквадорскиот град Гвајакил, каде што среде бел ден бил убиен маж кого властите го поврзуваат со една од најопасните криминални групи во земјата.
Жртвата е 39-годишниот Карлос Алберто Суастеги Вилануева, за кого еквадорскиот министер за внатрешни работи Џон Рајмберг изјави дека бил водач на фракција на криминалната организација Лос Агилас.
Според информациите, нападот се случил пред терминалот за пристигнувања, а снимките од безбедносните камери покажуваат двајца тинејџери кои чекале со цвеќе и кадифени играчки во рацете. Во еден момент, едниот од нив му пришол на Суастеги, извадил пиштол скриен зад кадифено мече и пукал од непосредна близина. По него се приближил и вториот напаѓач, кој испукал уште еден куршум пред двајцата да побегнат од местото.
Нападот предизвикал паника меѓу патниците и посетителите на аеродромот, кои во страв се разбегале низ терминалот. Во инцидентот бил повреден и еден случаен минувач.
Полицијата кратко по нападот привела двајца тинејџери осомничени за учество во убиството, а терминалот за пристигнувања бил затворен повеќе од два часа додека траела истрагата.
Бандата Лос Агилас била прогласена за терористичка организација во 2024 година со одлука на претседателот Даниел Нобоа. Властите ја поврзуваат со трговија со дрога, изнуда и други тешки кривични дела.
Убиството доаѓа во период кога Еквадор се соочува со сериозна безбедносна криза и раст на насилството поврзано со организираниот криминал. Само еден ден пред нападот, претседателот Нобоа повторно прогласи вонредна состојба во десет провинции, меѓу кои и провинцијата Гвајас, поради влошената безбедносна состојба.
Еквадор, кој се наоѓа меѓу Колумбија и Перу – едни од најголемите светски производители на кокаин – во последните години стана важна рута за шверц на дрога кон САД, Европа и други пазари, што придонесе за рекордно висока стапка на убиства во земјата.
