Министерот за култура и туризам Зоран Љутков, обраќајќи се на свеченото отворање на 66. издание на фестивалот „Охридско лето“, порача дека културата е темел на идентитетот и дека во изминатите две години биле направени значајни чекори за нејзино обновување.
„Среќен сум што изминативе две години девастираната македонска култура ја вративме на траекторија достојна за една државна културна политика“, истакна Љутков.
Тој нагласи дека културата не смее да биде предмет на импровизации, туку бара визија, трпение и љубов.
„Културата не трпи импровизации. Понекогаш не сме свесни за важноста на културната политика сè додека еден ден не се разбудиме со недостиг што тешко се надоместува. Таа бара визија, трпение и љубов што гледа подалеку од денешниот ден – кон генерациите што допрва доаѓаат“, рече министерот.
Според него, уметноста е универзален јазик преку кој светот го препознава македонскиот дух.
„Секој народ има свој јазик на кој разговара со светот, но постои еден јазик што сите го разбираат без преведувач – тоа е јазикот на уметноста. Преку него светот го чувствува нашиот сензибилитет, ја разбира нашата историја и ја препознава нашата духовност“, нагласи Љутков.
Во своето обраќање тој порача дека идентитетот не се брани со гласни зборови, туку се живее, создава и пренесува како највреден аманет.
Говорот го заврши со порака дека „Охридско лето“ треба и понатаму да остане светилник преку кој светот ќе го препознава македонското културно наследство.
