Пратеничката на СДСМ, Сања Лукаревска, на денешната седница за пратенички прашања побара од министерот за здравство Сашо Клековски одговор за мерките што се преземаат за заштита на граѓаните, особено на учениците, од западно-нилска треска.
Лукаревска посочи дека само ова лето во Македонија се потврдени 58 случаи на заболување, од кои осум со смртен исход. За споредба, во периодот од 2011 до 2025 година биле регистрирани вкупно 54 потврдени случаи и пет смртни случаи.
„Значи за 14 години пет смртни случаи, за едно лето осум смртни случаи или само ова лето се евидентирани повеќе заболени отколку во претходните 14 години заедно. И ова е навистина поразителен податок“, рече Лукаревска.
Таа потсети дека на 12 август била прогласена епидемија во повеќе скопски општини, по што било спроведено и авионско прскање против комарци, како и дезинсекција од земја.
Лукаревска нагласи дека, со оглед на тоа што нема вакцина ниту специфична терапија против вирусот, главните мерки за заштита се уништувањето на ларвите, дезинсекцијата и личната заштита од убоди од комарци.
Пратеничката предупреди дека почетокот на учебната година носи дополнителен ризик за учениците, кои можат да бидат изложени на убоди од комарци. Таа посочи дека постои протокол на Институтот за јавно здравје за спречување на ширење на заразни заболувања во училиштата, но дека во него нема конкретни мерки за заштита од западно-нилска треска.
Според Лукаревска, дополнителен проблем е тоа што општините во кои е прогласена епидемија – Аеродром, Кисела Вода, Бутел, Гази Баба и Илинден – постапуваат неусогласено во однос на заштитата од комарци.
„Имам впечаток дека истите неунифицирано постапуваат во одбрана од западно-нилската треска. Секој како знае и умее“, рече таа.
Лукаревска од министерот за здравство побара да одговори кои дополнителни мерки се преземени за заштита на учениците од западно-нилска треска и дали е изготвен и доставен посебен протокол за училиштата.
