Холандската министерка за одбрана и вицепремиерка Дилан Јешилгез-Зегериус остро ги осуди нередите што ги предизвикаа дел од мароканските навивачи по поразот на Мароко од Франција во четвртфиналето на Светското првенство.
„Една по една репрезентација го завршува настапот на турнирот. Тоа е суштината на фудбалот. Разочарани сме, но продолжуваме понатаму. Освен овие навивачи. Без разлика дали победуваат или губат, се однесуваат како лудаци. Зарем не ви е срам што светот ве гледа вака?“, напиша министерката на социјалната мрежа Икс.
Според холандските медиуми, по натпреварот дошло до повеќе инциденти во неколку градови. Во Ротердам, дел од навивачите фрлале стаклени шишиња кон полицијата, поради што интервенирале специјалните полициски единици. Во Амстердам, пак, биле испукувани огномети кон полицајци, а новинарски екипи биле изложени на агресивно однесување.
На случувањата реагираше и лидерот на крајната десница, Герт Вилдерс, кој ја обвини владејачката коалиција дека дозволила вакви проблеми.
Ова не е првпат по натпревар на мароканската репрезентација да избувнат нереди во Холандија. И по претходните натпревари на Мароко, полицијата приведуваше лица осомничени за насилство и нарушување на јавниот ред.
