Антитерористичката полиција е вклучена во истрагата за серијата насилни инциденти што се случија синоќа во Единбург, при што беа повредени пет лица.
Шкотската полиција соопшти дека е уапсен 36-годишен маж, а меѓу повредените има и лица од муслиманска вероисповед.
Првиот инцидент бил пријавен во петокот околу 20:50 часот во населбата Сајтхил, каде што биле нападнати двајца мажи. Според Шкотската асоцијација на џамии, двајцата верници биле нападнати во парк откако излегле од џамијата „Брумхаус“.
Подоцна полицијата добила пријави и за други инциденти во западниот и северниот дел на градот. Во близина на Телфорд Роуд и Лејт Вок биле нападнати уште тројца мажи.
Во нападите биле повредени пет мажи на возраст од 22, 22, 24, 27 и 39 години. Тројца од нив побарале лекарска помош во болница, но, според полицијата, никој не е во животна опасност.
Полицијата соопшти дека по апсењето на осомничениот не постои дополнителна опасност за јавноста.
Директорот за јавни прашања на Шкотската асоцијација на џамии, Омар Афзал, изјави дека во муслиманската заедница владеат шок и гнев по нападите.
„Овие напади се длабоко загрижувачки. Со години предупредуваме на последиците од нормализирањето на антимуслиманската омраза во јавниот простор“, изјави Афзал.
Помошникот началник на полицијата, Катриона Патон, порача дека во Шкотска нема место за расизам и верска омраза.
„Сакам јасно да порачам дека во Шкотска нема место за расизам и верска нетрпеливост. Безбедноста на јавноста беше наш главен приоритет“, изјави Патон.
На социјалните мрежи се појавија и снимки на кои се гледа маж со долго оружје како се движи низ улиците на Единбург и оштетува објекти. На друга снимка, истиот маж е совладан од полицијата.
Во тек е обемна истрага за утврдување на сите околности на инцидентите.
