Најмалку три лица се повредени во денешен напад со нож во Париз, а осомничениот напаѓач е уапсен кратко по инцидентот, пренесуваат француските медиуми, повикувајќи се на полициски извори.
Нападот се случил во близина на метро-станицата „Клиши“, на северот од француската престолнина. Според првичните информации, маж вооружен со два ножа околу 11:30 часот нападнал случајни минувачи.
Повредените веднаш биле пренесени во болница, а според информациите на француските медиуми, нивните животи не се во опасност.
Осомничениот бил забележан од полицаец кој во моментот не бил на должност. Тој веднаш повикал засилување, по што напаѓачот бил совладан и приведен со помош на полициска патрола.
На снимките објавени на социјалните мрежи се гледа дека осомничениот делувал дезориентирано. Според францускиот весник „Фигаро“, при апсењето тој наводно изјавил: „Алах ми нареди“.
Полицијата го истражува мотивот за нападот.
