(Видео) Мажите со качулки и фантомки го напуштаат „Ќациленд“, јавува Н1

Групите мажи облечени во црно, од кои дел носеа качулки и фантомки, вечерва почнаа да го напуштаат Пионерскиот парк во Белград, познат како „Ќациленд“, непосредно откако Александар Вучиќ го призна поразот на предвремените парламентарни избори во Србија, јавува телевизијата Н1.

Претходно, во текот на изборната вечер, во паркот пред зградата на Претседателството на Србија пристигнуваа групи непознати мажи, претежно облечени во темна облека. На снимките што ги објави порталот „Нова.рс“ се гледаше како дел од нив, со покриени лица, влегуваат во паркот, додека полицијата ги пропушта кај Андриќев венец.

— реклама —

Слични групи биле забележани и на други локации во Белград. Телевизијата „Инсајдер“ објави снимки од мажи со качулки кои се движеле од плоштадот „Никола Пашиќ“ кон Пионерскиот парк, а лица со слична облека биле забележани и во реонот на Ушќе.

— реклама —

Во близина на паркот биле распоредени припадници на Полициската бригада на српското Министерство за внатрешни работи, додека кај Стариот двор имало поголем број автомобили и автобуси.

Според Н1, по обраќањето на Вучиќ, во кое тој соопшти дека студентската листа победила на изборите, мажите што претходно се собрале во „Ќациленд“ почнале да заминуваат.

— реклама —

Во текот на денот во центарот на Белград беше забележано засилено полициско присуство, вклучително и возила на Жандармеријата во близина на Пионерскиот парк и седиштето на Републичката изборна комисија. На одредени локации биле поставени полициски кордони и заштитни огради, поради што на новинарските екипи привремено им бил отежнат пристапот до изборната комисија.

Во самиот парк, кој подолго време е место на собирање на поддржувачи на Вучиќ, повторно биле поставувани шатори и друга инфраструктура.

Засега нема официјални информации за идентитетот на мажите со покриени лица, кој го организирал нивното собирање и зошто го напуштиле паркот непосредно по признавањето на изборниот пораз. Нема ниту потврда дека нивното заминување било организирано или директно поврзано со изјавата на Вучиќ.