Медицинската сестра Стефани Столевска од Клиниката за анестезија, реанимација и интензивно лекување (КАРИЛ) упати апел до граѓаните да ја поддржат идејата за органодарителство, нагласувајќи дека секој човек може да биде и потенцијален пациент и потенцијален дарител на органи.
Во видео обраќање, објавено во рамки на националната кампања за подигнување на јавната свест за органодарителството и трансплантацијата, Столевска истакна дека дарувањето органи претставува врвен чин на човечност и солидарност.
„Како медицинска сестра-анестетичар и дел од тимот за трансплантација на органи, најпрво би сакала да изразам огромна благодарност до семејствата кои во исклучително тежок момент носат одлука за дарување органи. Иако се соочуваат со голема болка, тие придонесуваат да се продолжи нечиј друг живот“, посочи Столевска.
Таа упати повик до целата јавност почесто да размислува за органодарителството, нагласувајќи дека никој не знае што носи иднината.
„Сите сме потенцијални пациенти и потенцијални донори, затоа е важно да зборуваме за оваа тема и да покажеме хуманост“, порача Столевска.
Министерот за здравство, Азир Алиу, истакна дека преку кампањата „Органодарителството ѝ дава највисока смисла на човечноста!“ продолжуваат активностите за јакнење на довербата и свеста кај граѓаните.
„Последните трансплантации на срце и бубрег уште еднаш покажаа дека зад секој спасен живот не стои само медицинската експертиза, туку и една длабоко хумана одлука. Најсилната порака денес ја испраќаат здравствените работници, бидејќи тие секојдневно се сведоци и на болката на семејствата и на надежта на пациентите кои чекаат трансплантација“, порача министерот Алиу.
