Необична природна појава, позната како метеоцунами, е забележана на повеќе локации долж хрватското крајбрежје по силното невреме што ги зафати северниот и дел од средниот Јадран. Една од најизразените промени е регистрирана во Стари Град на островот Хвар.
Според хрватските медиуми, околу 23 часот нивото на морето најпрво се зголемило за повеќе од 30 сантиметри и се излеало на кејот, а потоа нагло се повлекло за околу 60 сантиметри под вообичаеното ниво. Поради тоа, дел од чамците останале на морското дно.
Очевидци раскажуваат дека сцените биле драматични.
„Луѓето бегаа во неверување. Небото беше ведро, без облаци, а потоа одеднаш голем бран помина низ кејот. Имаше многу луѓе кои гледаа натпревар, а потоа се случи ова“, изјавиле сведоци на настанот.
Здружението „Крометео“ оваа необична метеоролошка појава ја нарече „летно чудовиште“, наведувајќи дека не е вообичаена за овој период од годината. Оттаму претходно предупредија дека временските модели укажуваат на можност од ваков развој на настаните.
Нагли промени на нивото на морето се забележани и на други делови од Јадранот, од Истра до островите во средна Далмација. Во Пула морето се излеало на кејот, а слична појава е регистрирана и на пониските делови од брегот во Задар.
Претходно, силно невреме го зафати отвореното море на северниот и средниот Јадран, по формирањето на моќен грмежлив систем над северна Италија.
Во поширокото подрачје на Задар биле регистрирани силни налети на ветер, повеќе интервенции на пожарникарите поради паднати дрвја и град, а една едрилица се превртела на кејот.
Според експертите, метеоцунамито настанува како последица на нагли промени на атмосферскиот притисок, кои предизвикуваат осцилации на нивото на морето. Појавата е најизразена во долги и плитки заливи отворени кон правецот од кој пристигнуваат брановите.
