Пратеничката на Левица, Јована Мојсоска, во собраниската расправа за реконструкцијата на Владата упати серија критики за состојбите во здравството, оценувајќи дека честите смени на министри не ги решаваат системските проблеми.
Таа посочи дека за две години Владата назначува трет министер за здравство, додека, како што рече, пациентите со хемофилија повеќе од една година се соочуваат со недостиг на терапија.
„Добивме повеќе министри за здравство за две години отколку што се изградени клинички центри за 35 години. Тоа докажува дека Министерството за здравство продолжува да се перципира како плен за партиска поделба“, рече Мојсоска.
Таа побара новиот министер Сашо Клековски да го разреши директорот на Институтот за трансфузиона медицина, обвинувајќи го за состојбата со недостигот на лекови за лицата со хемофилија.
Во своето обраќање, Мојсоска се осврна и на Детската клиника, тврдејќи дека таму има недостиг од лекари, затворени одделенија и нерешени проблеми со управувањето. Таа ја критикуваше и, како што наведе, праксата со задржување на поранешни економски директори на советнички позиции.
Пратеничката оцени дека Владата не реализирала набавка на нови амбулантни возила, додека постапката за набавка на 100 возила, според неа, е проследена со сомнежи за ограничување на конкуренцијата.
Во завршницата на говорот, Мојсоска се осврна и на неодамнешниот случај со лице со психичко растројство за кое семејството јавно побара институционална помош, оценувајќи дека тоа е показател за нефункционалноста на системот.
„Ова веќе не е пропуст на системот, туку целосен колапс на системот“, порача Мојсоска.
