Пратеничката на Левица, Јована Мојсоска, на прес-конференција алармираше за, како што рече, сериозниот недостиг на лекот „Фактор 8“, кој е неопходен за лицата со хемофилија.
Според неа, пациентите повеќе од една година се соочуваат со ограничени количини од терапијата, откако во мај минатата година бил раскинат тендерот за набавка на лекот.
„Повеќе од една година лицата со хемофилија живеат во вистинска голгота поради недостигот на лекот ‘Фактор 8’. Уште од мај минатата година, кога беше раскинат тендерот за овој лек, пациентите постојано добиваат ограничени количини, далеку под нивните реални потреби“, изјави Мојсоска.
Таа посочи дека според информации доставени до Левица од пациенти, едно лице со хемофилија наместо потребните 30.000 единици месечно добива само 7.000 единици од лекот.
„Поради ваквите рестрикции, дел од пациентите се принудени да живеат врзани за кревет и се соочуваат со сериозно нарушен квалитет на живот“, рече Мојсоска.
Таа додаде дека со Институтот за трансфузиона медицина раководи директорот Амир Ељези и оцени дека повеќе од една година не е обезбеден лекот во потребните количини.
Мојсоска потсети и на изјава на заменик-министерот за здравство Јовица Андовски од јануари годинава, кога уверувал дека лекот ќе биде набавен во доволни количини.
„Лицата со хемофилија повторно алармираа до Левица дека лекот ‘Фактор 8’ го нема во потребните количини“, истакна таа.
Од Левица оценуваат дека е недозволиво пациентите да бараат и да молат за терапија од која им зависи здравјето.
„Нечовечно и нехумано е лица да молат за лек во држава која троши милиони на авокадо и аспарагус. Прашањето е кој ќе ја сноси одговорноста доколку кај лицата со хемофилија настапат животно-загрозувачки последици само поради неспособноста на директорот Ељези да го обезбеди потребниот лек ‘Фактор 8’“, порача Мојсоска.
