(Видео) „ДПМНЕ им брои залаци на студентите, а милион евра троши за владини настани“, вели Мојсоска

Пратеничката од Левица, Јована Мојсоска, ја критикуваше Владата поради одбивањето да обезбеди дополнителни средства за зголемување на субвенционираниот студентски оброк, посочувајќи дека истовремено се издвојуваат речиси еден милион евра за техничка поддршка на владини настани.

На расправата за ребалансот на Буџетот, Мојсоска информираше дека Левица поднела амандман со кој бара дополнителни 4,9 милиони евра за зголемување на студентскиот оброк, кој веќе три години изнесува 140 денари дневно. Амандманот не добил поддршка од пратениците на ДПМНЕ.

— реклама —

Таа посочи дека проблемот не е во потребата од воведување нов модел, туку во примената на постојниот закон, според кој износот на субвенционираниот оброк треба да се усогласува со инфлацијата по секоја фискална година, пред донесувањето на буџетот за следната година.

„На студентите не им требаат дебати и средби со министерката, туку почитување на законот. Вашите средби нема да им го надоместат она што две години наназад им е одземено“, порача Мојсоска.

— реклама —

Според пресметките на Левица, студентите во изминатите три години изгубиле вкупно 6,5 милиони евра поради неусогласувањето на износот со инфлацијата. Мојсоска оцени и дека проширувањето на кругот на корисници и зголемувањето на износот не се меѓусебно исклучиви мерки.

Како аргумент за критиките кон буџетските приоритети, пратеничката ја посочи набавката на Генералниот секретаријат на Владата, предводен од Игор Јанушев, во вредност од речиси еден милион евра за изнајмување и техничка поддршка на опрема за владини настани.

— реклама —

Мојсоска направи споредба меѓу средствата наменети за владините настани и одбивањето да се зголеми студентскиот оброк, оценувајќи дека наместо вложување во видеоѕидови, озвучување и светлосни ефекти, приоритет треба да биде подобрувањето на животниот стандард на младите.

Таа реагираше и на најавите за поголема контрола врз начинот на кој студентите ги користат средствата од субвенционираниот оброк, посочувајќи дека Владата не го зголемува износот и покрај растот на животните трошоци.

Од Левица порачуваат дека подобрувањето на студентскиот стандард бара конкретни буџетски мерки, а не само декларативни ветувања за задржување на младите во Македонија.