Бродот „Фемили“, со кој шведската активистка Грета Тунберг требаше да отплови кон Газа како дел од иницијативата „Глобална флота за Сумуд“, бил погоден од мистериозна експлозија во пристаништето Сиди Бу Саид во Тунис.
Организаторите на флотилата тврдат дека станува збор за напад со дрон и посочуваат дека на бродот во моментот се наоѓале членови на управниот одбор, но за среќа никој не бил повреден. На социјалните мрежи се појавија снимки и фотографии од оштетениот брод, што предизвикаа лавина реакции и обвинувања за израелска одговорност, придружени со ознаки како #FreePalestine и #GazaFlotilla.
BREAKING:
— Megatron (@Megatron_ron) September 9, 2025
pic.twitter.com/2vEFaWtGLa
Властите во Тунис, меѓутоа, ја отфрлаат таа верзија. Националната гарда соопшти дека во областа не е регистрирано присуство на дронови и дека првичните наоди укажуваат на пожар во складиштето со спасувачки елеци – веројатно поради човечка грешка или несреќен случај. Некои неофицијални објави дури тврдат дека член на екипажот запалил пиротехника, што предизвикало пожар, а подоцна било претставено како напад.
На местото на инцидентот присуствува и специјалната известувачка на Обединетите нации за човекови права во палестинските територии, Франческа Албанезе, која заедно со организаторите и локалните власти се обидува да ги утврди точните околности.
Испловувањето на „Магреб сумуд флотилата“ од Тунис досега неколку пати било одложувано – најпрвин поради временски неприлики, а потоа поради технички и логистички проблеми. Новиот датум за тргнување е закажан за 10 септември, кога таа треба да се приклучи на бродовите што тргнуваат од Шпанија и Италија, во рамките на пошироката меѓународна иницијатива.
