Француски активисти и еколошки организации организираа необичен протест во кој симболично беше користен мртовечки ковчег за да се означи „смртта“ на Windows 10, по одлуката на Microsoft да ја прекине редовната поддршка за овој оперативен систем. Со овој гест, учесниците сакаа да привлечат внимание кон, како што тврдат, зголемувањето на електронскиот отпад и практиките на планирано застарување што ги поттикнуваат големите технолошки компании.
Microsoft во октомври 2025 година ја прекина стандардната поддршка за Windows 10, но им овозможи на корисниците продолжена безбедносна поддршка преку програмата Extended Security Updates, која се добива под одредени услови и најчесто со дополнителни трошоци. И покрај оваа опција, дел од еколошките групи во Франција сметаат дека решението не е доволно и дека практично ги принудува корисниците да преминат на понови уреди.
Според извештаи на француската новинска агенција CLPress, протестот бил организиран од неколку колективи и организации кои сметаат дека одлуката на Microsoft ќе доведе до тоа милиони функционални уреди да завршат како електронски отпад. Тие предупредуваат дека за производство на нов лаптоп се потребни големи количини суровини, што дополнително ја оптоварува животната средина.
Активистите ја критикуваат и потребата од премин кон Windows 11, поради построгите хардверски барања, тврдејќи дека тоа ќе ги натера корисниците да купуваат нови уреди и на тој начин дополнително да се зголеми профитот на компанијата. Како дел од своите барања, тие го повикуваат Microsoft да ја продолжи поддршката за Windows 10 до 2030 година, наместо ограничените продолжени безбедносни ажурирања.
Во протестните активности учествувале шест организации, а иницијативата досега добила поддршка од околу 50.000 потписници преку петиција. Дел од учесниците отворено ги повикуваат корисниците да се откажат од Windows и да преминат на Linux-дистрибуции на постоечките компјутери, истакнувајќи дека тие можат да продолжат да функционираат без потреба од замена на хардверот.
И покрај притисокот, се оценува дека е малку веројатно Microsoft да ја промени својата стратегија, бидејќи компанијата веќе подолго време ги информира корисниците за крајот на поддршката за Windows 10 и се фокусира на премин кон понови верзии на системот.
