Дожд што утрово почна да паѓа во источниот дел на Белгија им помага на пожарникарите во борбата со најголемиот шумски пожар досега регистриран во земјата. Огнената стихија зафати околу 3.000 хектари, а постоеше опасност пожарот да се прошири и кон границата со Германија.
Околу 500 пожарникари од Белгија, Германија и Луксембург се борат со огнот, а белгиската метеоролошка служба очекува меѓу пет и девет милиметри дожд во погоденото подрачје. Дополнителни врнежи се најавени и за утре, при што температурата треба да се намали на 19 до 20 степени Целзиусови.
„Ова ќе промени сè. Освен водата што ја носи дождот, ќе се зголеми и влажноста“, изјави командантот на пожарникарите Оливие Гист за белгиската радиостаница RTBF.
Пожарот избувна во слабо населено подрачје со ридови, мочуришта и шуми. Според Европскиот информативен систем за шумски пожари, станува збор за најголемиот шумски пожар во историјата на Белгија, повеќе од двојно поголем од пожарот во 2011 година, кој зафати речиси 1.400 хектари.
Поради опасноста од ширење на огнот, локалните власти наредија евакуација на околу 600 жители од градовите Бутгенбах и Вајмс, додека германскиот град Моншау побара од жителите во близина на границата да го напуштат подрачјето. Властите засега не очекуваат пожарот да премине на германска територија, но предупредуваат на значително загадување на воздухот со чад.
На барање на Белгија, Европската Унија испрати три хеликоптери и два авиони за гасење пожари од различни делови на Европа. Високите температури и последователните топлотни бранови во Европа ја зголемија сушата и ја исушија вегетацијата, создавајќи услови за брзо ширење на пожарите и во подрачја кои вообичаено имаат влажна клима.
