Најмалку 132 лица загинаа, а повеќе од 480 се повредени по силниот земјотрес со магнитуда од 7,4 степени што ја погоди Колумбија, при што спасувачките екипи продолжуваат да трагаат по луѓе заробени под урнатините.
Земјотресот бил регистриран во понеделникот во 7:34 часот по локално време, на длабочина од околу 103 километри во покраината Чоко. Потресот бил почувствуван на широк простор во западниот дел на земјата.
Најголем број жртви се регистрирани во градот Переира, додека последици има и во околните градови и во регионот Вале дел Каука. Според последните информации, Переира има 60 загинати, а спасувачките служби продолжуваат со пребарување на оштетените и урнати објекти.
Колумбиските власти прогласија вонредна состојба, додека бројот на жртвите би можел дополнително да се зголеми со продолжувањето на спасувачките операции.
Епицентарот на силниот земјотрес во Колумбија бил во близина на селото Сан Хозе дел Палмар во покраината Чоко. Локалниот градоначалник Леон Фабио Марин Монкада соопшти дека во самото село нема загинати или повредени, но дека се оштетени пристапните патишта.
Најтешко е погоден градот Переира, на околу 55 километри од епицентарот. Снимките од централниот плоштад „Плаза Боливар“, чија автентичност ја потврдил Би-Би-Си, покажуваат уривање на најмалку една зграда, додека плоштадот бил прекриен со прашина и урнатини.
Локалните власти потврдиле најмалку 40 смртни случаи на поширокото подрачје на Переира, каде што се урнале 65 згради. Спасувачите претпоставуваат дека во уште 15 објекти би можело да има луѓе заробени под урнатините.
Во делови од градот е воведен полициски час до вторник во 5 часот наутро. Во Кали, град оддалечен околу 200 километри од епицентарот, се урнале 32 згради.
Жртви се регистрирани и во Манисалес, Кибдо и Меделин. Во Манисалес загинале најмалку две лица. Жителите сведочат за моменти на голема паника, паѓање тули и кршење стакло.
Оштетувања се пријавени и на регионалните аеродроми во Переира, Манисалес, Кибдо, Арменија, Картаго и Буенавентура. Во Богота потресот ги затресол дрвјата и семафорите, а на некои згради се појавиле пукнатини.
Колумбискиот претседател Абелардо де ла Есприела прогласил национална катастрофа, со што добива дополнителни овластувања за справување со последиците и пренасочување на буџетски средства. Тој потврдил дека се оштетени повеќе од 1.500 домови.
Помош понудиле и повеќе држави и меѓународни организации. САД соопштија дека ја следат состојбата и се подготвени да помогнат, додека Европската комисија потврди дека сателитскиот систем „Коперник“ е вклучен во спасувачките операции. Салвадор, исто така, понудил спасувачки тимови и опрема.
Според проценките на Американскиот геолошки завод, земјотресот го почувствувале околу 1,5 милиони луѓе. Експертите предупредуваат и на можноста од дополнителни потреси, кои можат да предизвикаат дополнителни оштетувања.
