(Видео) Најмалку 150 приведени на протест во Истанбул поради апсењата на ЛГБТК+ активисти

Најмалку 150 лица биле приведени во Истанбул по полициската интервенција на протест пред судот Чаглајан, каде што собраните сакале да изразат незадоволство поради неодамнешните апсења на ЛГБТК+ активисти, објави „Ројтерс“.

Групата се собрала пред зградата на судот за да даде изјава за медиумите, но полицијата го спречила тоа. За време на интервенцијата, демонстрантите извикувале: „Да живее животот и покрај омразата“.

— реклама —

Протестот следува по голема полициска акција против ЛГБТК+ здруженија во неколку турски покраини. Властите операцијата, наречена „Моето семејство е безбедно“, ја оправдуваат со потребата од заштита на децата и семејните вредности.

Во текот на викендот, властите привеле најмалку 26 лица во Истанбул и 21 во Анкара, а биле извршени и претреси во канцелариите на неколку ЛГБТК+ здруженија. Турски суд вчера одредил притвор за 16 лица во западната покраина Измир, соопшти локалното обвинителство.

— реклама —

Министерот за правда Акин Ѓурлек во неделата изјавил дека истрагите, координирани од обвинителствата во Истанбул, Анкара, Измир, Ајдин и Мерсин, опфаќаат 162 осомничени, девет здруженија и 13 компании во 15 покраини.

— реклама —

Властите, исто така, блокирале пристап до интернет-страници и профили на социјалните мрежи на различни ЛГБТК+ здруженија, поединци и независни медиуми, меѓу кои и профилот на турскиот огранок на „Амнести интернешнл“ на платформата „Икс“.

Комесарот за човекови права на Советот на Европа, Мајкл О’Флаерти, изразил загриженост поради апсењата, претресите и ограничувањата на интернетот насочени кон ЛГБТК+ граѓанските организации и активистите.

— реклама —

О’Флаерти порача дека повикувањето на семејните вредности или заштитата на децата само по себе не може да се користи како оправдување за ограничување на човековите права и повика на ослободување на сите лица приведени поради нивниот ангажман во граѓанското општество или во областа на човековите права.