При редовна теренска обиколка, вработени во Националниот парк Шар Планина имале несекојдневна средба со две мали срниња, кои накратко им притрчале пред повторно да се вратат во шумата.
Од Националниот парк информираат дека станува збор за многу млади срни, најверојатно стари само неколку недели, што може да се забележи по нивните карактеристични бели дамки.
„Тие накратко се стрчаа кон нас, веројатно во потрага по својата мајка, а потоа мирно се вратија во шумата“, велат од паркот.
Оттаму појаснуваат дека иако однесувањето на младенчињата понекогаш може да изгледа збунувачки, тие најчесто не се напуштени, бидејќи мајката обично се наоѓа во близина и периодично се враќа за да ги дои и заштити.
Според проценките на вработените, срнињата биле во добра здравствена состојба, без видливи знаци на повреди или дехидрација, поради што биле оставени во нивното природно живеалиште.
Од Националниот парк упатуваат и апел до посетителите на планината да не ги допираат, преместуваат или земаат со себе младенчињата од дивите животни.
„Најголемата помош што можете да им ја дадете е да им обезбедите мир и да ѝ дозволите на природата да го следи својот тек“, порачуваат од паркот.
