Градоначалникот на Град Скопје, Орце Ѓорѓиевски, најави изградба на мега-парк на површина од 72.000 квадратни метри на локација во Карпош, која, како што посочи, со години била запуштена и претворена во дива депонија.
Според него, просторот што долго време бил симбол на негрижа и неодржување ќе биде целосно преуреден во модерен зелен парк со бројни содржини за граѓаните.
„Она што со години беше претворено во дива депонија, денес го претвораме во огромен мега-парк. Наместо запуштен простор, ќе создадеме место за живот, рекреација и дружење“, истакна Ѓорѓиевски.
Тој најави дека мега-паркот ќе биде хортикултурно уреден и ќе содржи парк за домашни миленици, детски игралишта, спортски центар, велосипедски полигон, урбана опрема и други содржини наменети за посетители од сите возрасти.
Ѓорѓиевски оцени дека новиот парк ќе претставува „новите бели дробови на Скопје“, каде што граѓаните ќе можат да го поминуваат слободното време во уредена и зелена средина.
„Од дива депонија до мега-парк, од запуштен простор до нов симбол на Карпош – ова е уште еден чекор кон подобро и позелено Скопје“, порача градоначалникот.
