(Видео) Огнената стихија не запира: Во Белгија изгореа 3.000 хектари, повторно избувнаа нови жаришта

Ситуацијата со големиот шумски пожар во источна Белгија повторно се влошила откако во текот на ноќта избувнале нови жаришта во природниот резерват Високи Фени. Досега огнот уништил околу 3.000 хектари, а силното невреме дополнително им ја отежнало работата на пожарникарите.

И покрај тешките услови, пожарникарските екипи во текот на ноќта морале да интервенираат на голем број повторно активирани жаришта, особено во источниот дел од погоденото подрачје. Намалената видливост, паднатите дрвја, калта и непристапните патишта значително го отежнувале движењето и гаснењето.

— реклама —

На терен се ангажирани нешто помалку од 200 пожарникари од Фландрија, Валонија, Брисел и Германија. Германските екипи од денес постепено ќе се повлекуваат, додека земјоделците кои доброволно помагаа во гаснењето во изминатите денови ќе продолжат да бидат ангажирани.

— реклама —

Штом временските услови дозволат, над подрачјето ќе бидат испратени дронови за да се добие прецизна слика за распространетоста на пожарот и да се утврдат зоните каде што интервенцијата е најитна.

— реклама —

Во гаснењето учествуваат и хеликоптери и авиони испратени од Холандија, Германија, Норвешка и Шведска.

Пожарот веќе доведе до евакуација на делови од германскиот пограничен град Моншау. Во Белгија и натаму е во сила евакуацијата на населените места Лајкаул и Кихелшајд во општината Битгенбах.