Најмалку 22 лица загинаа во силен земјотрес со магнитуда од 7,4 степени што во понеделникот го погоди западниот дел на Колумбија.
Најмногу жртви, 18, се потврдени во Переира, додека три лица загинале во Манизалес, а едно во Буенавентура.
Епицентарот на земјотресот бил во близина на Сан Хозе дел Палмар, во департманот Чоко. Силниот потрес предизвикал голема материјална штета во повеќе градови, а бил почувствуван и во Богота и надвор од границите на Колумбија.
Во Кали се урнале околу 20 згради, при што има луѓе заробени под урнатините. Градските власти побарале помош од спасувачки екипи од Богота и Меделин. Повредени и сериозно оштетени објекти има и во Кибдо, главниот град на Чоко.
Голема штета е пријавена и во Переира, додека во Манизалес е оштетена кулата на катедралата. Поради оштетувањата е прекинат сообраќајот на шест аеродроми – во Переира, Манизалес, Кибдо, Ерманија, Картаго и Буенавентура.
Колумбискиот претседател Абелардо де ла Есприела наредил формирање единствен кризен штаб во Сан Хозе дел Палмар за координација на спасувачките активности и санирање на последиците. Тој најавил и дека лично ќе отпатува во Переира.
Спасувачките екипи продолжуваат со потрагата по лица кои би можеле да се наоѓаат под урнатините, додека властите предупредуваат и на можноста од дополнителни потреси.
