Уредувањето и користењето на охридските плажи на Општина Охрид и на ЈП „Охридски комуналец“ им носи вкупен годишен приход од приближно 700.000 евра, изјави градоначалникот Кирил Пецаков во „Вечер во Охрид со Ландов и Вик“.
Пецаков нагласи дека не станува збор за класични концесии, туку за закуп на простор за поставување урбана опрема. Според него, ваквиот начин на управување со плажите создава приход што повторно се вложува во градот.
„Не е класична концесија, туку секој плаќа за користење на плажата. Општина Охрид, заедно со обврските што ги имаат кон ЈП ‘Охридски комуналец’, на годишно ниво има приближно 700.000 евра приход“, рече Пецаков.
Тој тврди дека приходите од плажите помогнале и во раздолжувањето на Општината.
„Тоа ми помогна во раздолжувањето на Охрид. Јас сето тоа свесно го направив и јасно ми беше што треба да постигнеме“, изјави градоначалникот.
Пецаков рече дека е особено горд на организираното уредување на плажите, откако тие претходно биле затворени. Тој додаде дека Општина Охрид сега е раздолжена и работи со позитивна сметка, а капиталните вложувања во последните две години, според податоците што ги изнесе, изнесуваат приближно 16 милиони евра.
