Охрид треба да ја добие долгонајавуваната катна гаража следното лето, најави градоначалникот Кирил Пецаков во емисијата „Вечер во Охрид со Ландов и Вик“.
Прашањето за недостигот од места за паркирање беше отворено откако гостите во емисијата посочија дека долго барале каде да ги остават возилата. Пецаков рече дека во најфреквентниот дел од летото капацитетите во градот се речиси целосно исполнети, а бројот на луѓе во Охрид повеќекратно се зголемува.
„Нормално е да има недостиг од места за паркирање. Имаме период, особено од 20 јули до 15 август, кога капацитетите се речиси исполнети и Охрид, од град со педесетина илјади жители, заедно со посетителите од соседните градови, во една вечер станува град со повеќе од 150.000 луѓе“, рече Пецаков.
Тој најави дека катната гаража ќе се гради во централното градско подрачје и дека проектот, за кој со години се разговарало, треба да биде завршен до следното лето.
„Тука ќе биде катната гаража во Охрид, проект за кој со години се разговараше и кој беше високо меѓу потребите што ги имаат охриѓани. Конечно, светлото на крајот од тунелот ќе се види наредното лето и затоа сум особено горд на тој проект“, изјави Пецаков.
Зборувајќи за финансиската состојба на Општината, тој рече дека на почетокот од мандатот бил затекнат долг од 14,5 милиони евра, додека сега Општината, според него, е раздолжена и има позитивна сметка.
Пецаков додаде дека во последните две години биле реализирани капитални вложувања од приближно 16 милиони евра, од кои девет милиони биле обезбедени од државата, а шест милиони директно од Општина Охрид. Тој најави и десет нови капитални проекти што веќе се во постапка за набавка.
