Главниот град на Либан утрово се соочува со хаотична состојба, откако илјадници жители почнаа масовно да ги напуштаат јужните предградија на Бејрут во пресрет на најавените израелски воздушни напади.
Според локалните извештаи, на сообраќајниците се формирале километарски колони и големи сообраќајни застои, додека граѓаните во паника се обидуваат да се евакуираат од подрачјата што би можеле да бидат цел на израелската армија.
Слични сцени беа забележани и на почетокот на март, кога Израел ја започна најновата офанзива против Хезболах.
Израелскиот премиер Бенјамин Нетанјаху претходно нареди воздушни напади врз Бејрут, наведувајќи дека тие претставуваат одговор на, како што рече, „повторените и континуирани прекршувања на примирјето од страна на терористичката организација Хезболах“.
И покрај формално прогласениот прекин на огнот, израелските сили во последните денови значително ги проширија воените операции во Либан. Според достапните информации, новите наредби за евакуација што ги издава израелската армија веќе опфаќаат околу 15 проценти од територијата на Либан.
Засега нема официјални податоци за евентуални жртви или материјални штети, додека меѓународната заедница со загриженост ја следи ескалацијата на тензиите во регионот.
