Либан денеска во Рим започнува нова рунда преговори со Израел, со посредство на Соединетите Американски Држави, во обид да се постигне постепено повлекување на израелските сили од јужниот дел на земјата.
Разговорите се темелат на рамковниот договор постигнат кон крајот на јуни, според кој либанската армија треба постепено да се распоредува во таканаречени „пилот-зони“ што ќе ги напушта израелската војска. Договорот предвидува и разоружување на проиранската група Хезболах.
Првата таква зона веќе е воспоставена во градот Завтар ал Гарбија, каде што либанската армија се распореди на 21 јули и им овозможи на жителите да се вратат во своите домови.
Италијанскиот министер за надворешни работи, Антонио Тајани, по средбите со претставниците на либанската и израелската делегација, ги повика двете страни да продолжат конструктивно да работат на спроведување на договорот и да изнајдат заеднички решенија.
Либанскиот премиер Наваф Салам изјави дека се вложуваат напори за постепено повлекување на израелските сили, со крајна цел целосно напуштање на либанската територија.
Според американскиот Стејт департмент, седмата рунда преговори ќе трае од 4 до 6 август, а главни теми ќе бидат проширувањето на „пилот-зоните“, решавањето на преостанатите гранични прашања и подготовката на поширок мировен и безбедносен договор меѓу двете земји, кои формално сè уште се во воена состојба.
Американскиот амбасадор во Либан, Мишел Иса, порача дека договорот мора да се спроведува внимателно и постепено за да не се загрози безбедноста на цивилното население.
Во меѓувреме, Хезболах повторно го отфрли рамковниот договор и одби да го предаде оружјето. Лидерот на движењето, Наим Касем, оцени дека директните преговори со Израел „ќе донесат само срам и понижување“, обвинувајќи го либанскиот претседател дека предизвикува поделби во земјата.
Иако насилството е намалено од јуни наваму, либанските власти и понатаму известуваат за повремени израелски напади врз јужниот дел од земјата.
