Израел денеска ги продолжи нападите врз Хезболах во Либан и покрај предупредувањата од Иран да ги запре воените операции.
Израелските власти претходно најавија нови удари врз позициите на милитантната група поддржана од Техеран, а нападите продолжија и во текот на денот.
Во јужниот либански пристанишен град Сидон, очевидци сведочеа за паника меѓу жителите кои бегаа покрај запалени автомобили, додека екипите на брза помош се обидуваа да го изгаснат пожарот предизвикан од израелски напад со дрон.
Според либанската државна новинска агенција, во нападот загинале две лица. Државните медиуми јавија и дека во одвоени напади во близина на градот Тир вчера биле убиени уште шест лица.
Либанското Министерство за здравство соопшти дека од 2 март досега во израелските напади низ земјата загинале најмалку 3.696 лица, додека 11.413 биле повредени.
Поради интензивирањето на судирите, затворени се три болници, а уште 17 здравствени установи претрпеле оштетувања.
Израел наведува дека операциите се насочени кон инфраструктурата и борците на Хезболах, додека Либан предупредува на сè потешките последици врз цивилното население и здравствениот систем.
