Либан и Израел денеска започнаа нов круг преговори во Вашингтон, при што Бејрут настојува да го продолжи директниот дијалог со Израел, иако процесот е засенет од одлуката на Иран да го вклучи Либан во своите разговори со САД.
Либанските власти сметаат дека директните преговори со Израел се единствениот начин да се стави крај на конфликтот што трае од 2 март, кога вооружената група Хезболах започна напади врз Израел во знак на поддршка за Иран. Последователните израелски воздушни и копнени напади врз Либан однесоа повеќе од 4.000 животи.
Сепак, четирите рунди преговори меѓу Либан и Израел од април досега не доведоа до траен прекин на огнот. Најдолгиот период без борби беше постигнат оваа недела, откако Иран и САД постигнаа договор за разбирање кој предвидува прекин на конфликтите на сите фронтови, вклучително и во Либан.
Либанските власти предупредуваат дека Техеран не може да преговара во име на Либан. Претседателот на Либан, Жозеф Аун, изјави дека новата рунда разговори треба да биде решавачка за иднината на земјата.
Според претставник на американскиот Стејт департмент, во разговорите учествуваат воени и политички претставници од двете држави, а целта е постигнување сеопфатен мировен и безбедносен договор.
Либан на преговорите ќе бара јасна временска рамка за повлекување на израелската војска од јужниот дел на земјата. Од друга страна, израелските власти најавија дека нивните сили ќе останат во јужен Либан во догледна иднина.
Израел, пак, како главна цел на преговорите го посочува разоружувањето на Хезболах и постигнувањето вистински мировен договор со Либан. Од израелската влада наведуваат дека токму Хезболах претставува најголема пречка за постигнување траен мир.
Во меѓувреме, либанската влада внимателно се обидува да го разоружа Хезболах, избегнувајќи директен судир со групата поради стравувањата од можен граѓански конфликт. Хезболах, пак, го отфрла целосното разоружување и бара прекин на директните преговори со Израел.
