(Видео) Песни, прегратки и солзи радосници - студентите слават победа во Србија: „Нема да се делиме на победници и поразени“

Студентската изборна листа „Студентите победуваат“ вечерва прогласи победа на предвремените парламентарни избори во Србија, откако првите процени на ЦеСИД и Ипсос покажаа дека освоила околу 52 проценти од гласовите и дека би можела да обезбеди самостојно мнозинство во Народното собрание.

Според проекциите направени врз основа на 56 проценти од обработениот примерок, студентската листа би освоила приближно 138 пратенички мандати, додека листата на Александар Вучиќ околу 104. За парламентарно мнозинство во Србија се потребни најмалку 126 од вкупно 250 пратеници.

Во централниот изборен штаб на студентите започна големо славје, а претставниците на листата им се обратија на граѓаните со порака дека земјата влегува во ново политичко поглавје.

„Драга Србијо, вечерва се слуша гласот на народот, вечерва се слуша гласот на слободата. Вечерва граѓаните на Србија покажаа дека ниту една пречка не е поголема од нивната волја, дека ниту еден страв не е посилен од нивната храброст и дека ниту една сила не може засекогаш да го надвладее народот што одлучил да ја земе својата судбина во свои раце“, порачаа студентите.

— реклама —

Тие ги повикаа граѓаните да ја прослават победата мирно и достоинствено, без провокации, судири и насилство.

„Нашиот одговор на секоја провокација нека биде достоинство, на секоја навреда мир, а на секој обид да нè поделат уште посилна солидарност“, нагласија претставниците на студентската листа.

Според нив, повеќемесечната борба не смее да биде засенета со инциденти во изборната ноќ.

„Не се боревме со месеци за вечерва да го изгубиме она што цело време нè правеше посилни: вербата во правдата, солидарноста и ненасилството“, порачаа тие.

— реклама —

Студентите истакнаа дека славјето е само почеток, а дека вистинската одговорност започнува со преземањето на власта.

„А утре? Утре започнува работата. Сериозна, одговорна и тешка работа за изградба на Србија во која законот важи еднакво за сите, во која вистината не се казнува, во која знаењето се почитува, во која младите ја гледаат својата иднина и во која ниту еден човек не мора да се плаши затоа што размислува поинаку“, порачаа тие.

Во обраќањето нагласија дека не ветуваат лесни промени, туку дека ќе останат посветени на причините поради кои започнало студентското движење.

— реклама —

„Нема да заборавиме дека власта не е привилегија, туку одговорност кон народот“, истакнаа студентите.

Тие порачаа дека победата не им припаѓа само на кандидатите од листата, туку на сите граѓани што ги поддржале и учествувале во политичките промени.

„Студентите победија. А со нив победи и надежта дека Србија може да биде земја на правда, слобода и достоинство“, порачаа претставниците на листата, предизвикувајќи воодушевување кај присутните.

Истовремено, најавија дека нема да ја делат земјата на победници и поразени, туку ќе се обидат да изградат општество во кое политичките разлики нема да бидат причина за поделби.

„Нека оваа ноќ биде почеток на едно ново поглавје. Поглавје во кое нема да се делиме на победници и поразени, туку заедно ќе градиме земја во која секој има право на глас, на вистина и на иднина“, порачаа тие.

Обраќањето заврши со зборовите: „Вечерва славиме победа, од утре ја градиме иднината. Да живее слободата! Да живее Србија! Студентите победија!“

Според известувањето на телевизијата Н1, во изборниот штаб имало голем број новинари и поддржувачи, а по говорот продолжило славјето со музика и скандирања „Победа“.

Студентската листа ја прогласи победата врз основа на прелиминарните процени на ЦеСИД и Ипсос. Конечните изборни резултати и распределбата на мандатите треба да ги потврди Републичката изборна комисија.